19.08.2013 во 12:35:45

Почитувана г. Даниела Алексовска, Во врска со Вашата порака испратена до Општина Аеродром, која се однесува на јазиците кои ќе се изучуваат како втор странски јазик во шесто одделение во ОУ „Љубен Лапе“ во новата учебна година, Ве информираме за следното: Согласно Наставниот план за деветгодишно основно образование за учебната 2013/2014 година, донесен од страна на Бирото за развој на образованието, во шесто одделение во основното училиште, како задолжителни наставни предмети, се изучуваат англискиот јазик и втор странски јазик. Јазикот кој се изучува како втор странски јазик не е изборен предмет, туку задолжителен наставен предмет, а истиот конкретно се определува во зависност од наставниот кадар со кој располага основното училиште. Доколку во основното училиште постои наставен кадар за повеќе од еден странски јазик, освен англискиот, постои и можност да се изучуваат и повеќе јазици како втор странски јазик, при што во различни паралелки ќе се изучуваат различни јазици како втор странски јазик. Општина Аеродром го запозна со Вашиот проблем директорот на ОУ „Љубен Лапе“, кој истакна дека во учебната 2013/2014 година, во три паралелки од шесто одделение како втор странски јазик ќе се изучува францускиот јазик, а во две паралелки ќе се изучува германскиот јазик, согласно можностите и располагањето со потребниот наставен кадар за одржување на наведените часови. Исто така, директорот на училиштето не информираше дека во паралелките во кои ќе се изучува германскиот јазик има простор за преминување на ученици од други паралелки, доколку постои интерес кај родителите. Со оглед на горенаведеното, а имајќи предвид дека во ОУ „Љубен Лапе“ е целосно реализиран наставниот план за втор задолжителен странски јазик, Ве упатуваме да се обратите до директорот на училиштето, со цел решавање на Вашиот проблем со евентуално преминување на Вашето дете во паралелка во која е определено да се изучува германскиот јазик во претстојната учебна година. Со почит, Сектор за образование, спорт, култура и заштита Општина Аеродром Ви благодариме, што го користевте граѓанскиот сервис центар на општина Аеродром.

Назад